Get ég fengið Röggu á tölvuna mína?

Windows
Já. Ef þú þarft að nota Röggu það mikið að vefþjónustan dugi þér ekki. Ragga er íhlutur fyrir taltæknihugbúnað og er þannig einnig fáanleg með skjálesurum af ýmsum gerðum.

Þar kostar hún 50 þúsund kall, tæpan og fæst hjá Örtækni.


Mac OS X
Já. Ragga er þjónusta sem hugbúnaðurinn „Upplestur 2008“ notar en hann er væntanlegur á markað fljótlega. Áhugasamir geta tekið þátt í prófunum með því að skrá sig á vefnum stafsetning.is. 

Af hverju hljómar Ragga betur hjá ykkur?

Ragga er íhlutur, sem kann ekkert annað en að bera fram texta nokkuð skammlaust - ef textinn er á íslensku.

Hægt er að fínstilla Röggu með því að láta hana segja hljóðritaðan texta - brjóta hann upp, setja inn þagnir, feika útlend orð og fleira. Það er það sem við gerum.

Okkar Ragga kemur því alltaf til með að hljóma betur en Ragga einhvers staðar annars staðar.

Segja má að þetta sé spurning um að kunna að fara með verkfærið.

Get ég stutt Röggu?

Það væri ósköp vel þegið.

Mikil vinna fór í gerð Röggu og rekstrakostnaður er þó nokkur. Þar vegur bandvíddarkostnaður þyngst, því við leitumst við að hafa hljóðgæðin eins mikil og hægt er þannig að Ragga hljómi vel fyrir þá sem hana nota.

Allur stuðningur er því vel þeginn, hvort sem hann er fjárhagslegur eða í formi aðstoðar við að koma Röggu í tæknilegt samband við önnur kerfi.

Hafðu samband við Tóta ef þú vilt leggja hönd á plóg.

Ragga fyrir skóla

Skólar og aðrir sem þjónusta lesblinda námsmenn geta fengið aðgang að Röggu á hagkvæmu verði.

Við vinnum nú að því með Fjölbraut í Garðabæ að hanna síður sem auðvelda nemendum námið, bæði með því að lesa fyrir þá texta og með því að auðvelda þeim að taka próf.

Röggu er þá beitt sem prófarkalesara, þannig að nemandinn heyrir það sem hann slær inn á lyklaborðið og getur þá breytt því sem lesblindan hefur haft áhrif á.

Áhugasamir geta haft samband við okkur í þjónustupósthólfinu.

Vefþjónusta fyrir fyrirtæki og stofnanir

Ragga er í boði sem vefþjónusta fyrir þau fyrirtæki og stofnanir sem láta aðgengismál sig einhverju skipta.

Hnappur fyrir Röggu er þá felldur inn í vefumsjónarkerfi fyrirtækjanna og birtist með greinum á vef þeirra.

Ragga er eftir sem áður hýst hjá okkur, en fyrirtækið missir viðskiptavininn ekki út af síðunni sinni, kjósi hann að nota Röggu.

Mánaðarlegu áskrifargjaldi er stillt í hóf, kr. 9.500,- án VSK.

Ragga fyrir stærri vefi

Ef um er að ræða stærri vefi með mikilli umferð og álagi þá bjóðum við kerfið sem heldur utan um Röggu til hýsingar innan dyra hjá vefjunum.

Í þeim pakka fylgja allar uppfærslur á málfarsstýringu og hljóðritunum.

Verð er samsett úr uppsetningar og leyfisgjaldi fyrir Röggu sjálfa, sem fer eftir fjölda samtímatenginga við hana og mánaðarlegt gjald fyrir uppfærslur.

Leita má tilboða með því að senda póst til Tóta.

Ragga á einstaklingsvefjum

Hægt er að útbúa viðbót við flesta vefi svo hægt sé að spila texta beint af þeim.

Þetta á einnig við um einstaklingsvefi og blogga.

Í sumum tilfellum verður boðið upp á það sem hluta af bloggumsýslukerfum, t.d. verður Ragga í boði sem viðbót á bloggkerfinu okkar á www.hexia.net.

Hvernig virkar Ragga?

Ragga er talgervill sem byggir á RealSpeak 4, sem er talgervilstækni sem fyrirtækið Nuance þróar.

Munurinn á Röggu og eldri gerðum talgervla er sá að hún stafar ekki hljóðin heldur á hún í mörgum tilfellum orðið í heild sinni í réttri mynd. Þannig hljómar hún umtalsvert betur en eldri gervlar, þar sem samskeyti hljóða eiga það til að heyrast mjög greinilega.

Þegar við vorum að búa hana til var lögð mikil vinna í að kortlegga öll hljóð sem notuð eru í nútíma íslensku - og síðan var saminn texti þar sem öll þessi hljóð komu fyrir í öllum hljómföllum sem notuð eru.

Ragnheiður Clausen var fengin til að lesa þennan texta og eyddi hún nokkrum vikum í hljóðveri við það. Þess má til gamans geta að Nuance hefur aldrei séð nokkrar upptökur ganga svo hratt og örugglega fyrir sig - og eiga Ragnheiður og upptökustjórarnir í Stúdíó Upptekið mikinn heiður skilinn.

Þegar búið var að lesa textann voru upptökurnar sendar til Belgíu, þar sem þær voru klipptar niður í svokallaða hljóðunga, sem eru hljóðbútar af mismunandi lengdum.

Morgunblaðið og Edda - miðlun og útgáfa, höfðu látið okkur í té tíðnitöflur yfir algengustu orð í íslensku skrifmáli og voru þær töflur hafðar til hliðsjónar við val á orðum sem æskilegt væri að væru til heil.

Fyrsta tilraunaútgáfa Röggu leit svo dagsins ljós og reyndist merkilega góð. Þó voru tveir hljóðungar sem voru vitlaust klipptir saman, sem varð til þess að samskeytin heyrðust mjög greinilega. Því var umsvifalaust kippt í liðinn og Ragga hljómar nú eins og hún á að gera.